Vir jou het ek haar net geleen

dogtertjie

Ek sien jou orals waar ek gaan
Dis jy wat by die tafel staan
Met handjies uitgerek na meer
Gesiggie vol van vreugde weer

Ek sien jou orals waar ek gaan
Dis jy wat hier by my kom staan
Jou handjies uitgerek na my
“Mamma, kan ek nog lekkers kry?”

Ek sien jou orals waar ek gaan
Weg is nou my hartseer traan
Jou lyfie druk weer teen my vas
Dis asof werklikheid nooit was.

Maar jy het na die Heer gegaan
Dis Hy wat hier by my kom staan
Hy troos en sê ek moenie huil
Belowe om by Hom te skuil

Ag Here kan sy net een keer
By my kom sit en glimlag weer
My hartseer en my rou verdriet
Sal heel verdwyn so in die niet

Ek sien jou orals waar Ek gaan
Dis Ek wat hier by jou kom staan
Vir jou het ek haar net geleen
Ek is so bly, sy was ń seën.

© Wikus Hattingh